කොරියානු රැකියා අපේක්ෂකයන්ට සුබ පණිවිඩයක්

ශ්‍රී ලංකාවට නව රැකියා දොරටු රැසක් විවර කරන බව කොරියානු අග්‍රාමාත්‍ය හන් ඩක් සූ මෙරට අග්‍රාමාත්‍ය දිනේෂ් ගුණවර්ධන හමුවේ ප්‍රකාශ කර තිබෙනවා.

ඒ, අග්‍රාමාත්‍ය දිනේෂ් ගුණවර්ධන කොරියානු අග්‍රාමාත්‍ය හන් ඩක් සූ ඊයේ (අප්‍රේල් 4) සෝල් නගරයේ පිහිටි අග්‍රාමාත්‍ය කාර්යාලයේදී හමුවූ අවස්ථාවේදී.

කෘෂිකාර්මික, ඉදිකිරීම් හා වෙනත් කර්මාන්ත සඳහා තම රටේ රැකියා ලබා දෙන ශ්‍රම බලකායට අමතරව සෞඛ්‍ය සේවා හා වෘත්තික සේවා සඳහා නව රැකියා ලබාදීමේ හැකියාව පිළිබඳවයි කොරියානු අග්‍රාමාත්‍යවරයා මෙහිදී සඳහන් කර ඇත්තේ.

පසුගිය වකවානුවේ පැවති මූල්‍ය අර්බුදය හමුවේ නැවත නැගී සිටින ශ්‍රී ලංකාවට, තම රට පැරිස් සමාජයේ සාමාජිකයෙ කු ලෙස ඉදිරි කටයුතු සාර්ථකව කරගෙන යාම සඳහා ඒ තුළ සෑම විට ම පෙනී සිටින බව කොරියානු අග්‍රාමාත්‍යවරයා සඳහන් කර තිබෙනවා.

පුනර්ජනනීය බලශක්ති අවශ්‍යතාව, ධීවර ක්ෂේත්‍රය හා ඒකාබද්ධ ආයෝජන ක්ෂේත්‍රයන්හි දැනට ගිවිසගෙන ඇති ව්‍යාපෘති එලෙස ම ක්‍රියාත්මක කරන අතර, ක්‍රියාත්මක කළ යුතු ඉදිරි ව්‍යාපෘති සඳහා වන පූර්ව කටයුතු සඳහා වන කාලය අවම කිරීමට පියවර ගන්නා ලෙස ද කොරියානු අග්‍රාමාත්‍යවරයා ඉල්ලා තිබෙනවා.

පාවෙන සූර්ය බල ශක්ති ඉදිකිරීම් සඳහා වන ඉඩ තව තවත් වැඩි කිරීමේ වැදගත්කම කොරියානු අග්‍රාමාත්‍යවරයා පෙන්වා දී තිබෙන අතර කොරියානු ජනතාව ද ශ්‍රී ලංකාවේ සංචාරය කිරීමට ඉතා ප්‍රියතාවයක් දක්වන බවත්, ලෝකයේ ආකර්ෂණීය ම සංචාරක ගමනාන්තයක් වන ශ්‍රී ලංකාවේ සංචාරය කිරීමේ වැඩි ඉඩකඩ ලබාදීමට සහය දැක්වීමට ද කොරියානු අග්‍රාමාත්‍යවරයා එකඟත්වය පළ කර තිබෙනවා.

LEAVE A REPLY

Please enter your comment!
Please enter your name here

Latest

More articles