කුරුණෑගල නගරයේ ප්‍රසිද්ධ පාසලක ඉගෙනුම ලබන ළාබාල සිසුවියන් පිරිසක් ලිංගික අපයෝජනයට ලක්කිරීමේ සිද්ධියකට සම්බන්ධ එම පාසලේ සේවයේ නිරතව සිටි ඉංග්‍රීසි ගුරුවරයකු අත්අඩංගුවට ගත් බව කුරුණෑගල මූලස්ථාන පොලිසිය පවසනවා.
සැකකාර ගුරුවරයා වැල්ලව ප්‍රදේශයේ නිවෙසක සැඟවී සිටිය දී පොලිසියට ලද තොරතුරකට අනුව අත්අඩංගුවට ගෙන තිබෙනවා.
මෙම අපයෝජන සිද්ධිය පසුගිය වසරේ නොවැම්බර් මාසයේ දී පොලිසියට වාර්තා වී ඇති අතර ඒත් සමඟ මෙම ගුරුවරයා සේවයට පවා වාර්තා නොකර තැනින් තැන සැඟවෙමින් සිටි බව පොලිසිය සඳහන් කරනවා.
අවුරුදු පනස් හතක් වයසැති අවිවාහක ගුරුවරයකු වන සැකකරු මෙම සිද්ධියෙන් අනතුරුව සේවයට වාර්තා නොකිරීම හේතුවෙන් මේ වන විට සේවය ද අත්හිටුවා ඇති බවයි වාර්තා වන්නේ.
මෙම සැකකරු එම පාසලේ හයවන වසරේ ඉගෙනුම ලබන සිසුවියන් පස්දෙනෙකුගේ සිරුරු ස්පර්ශ කරමින් අපයෝජනයට ලක් කර ඇති බව පොලිස් විමර්ශන තුළින් අනාවරණය වී තිබුණා.
ඒ අනුව මෙම සිදුවීම සම්බන්ධයෙන් වයඹ පළාත භාර ජ්‍යෙෂ්ඨ නියෝජ්‍ය පොලිස්පතිගේ උපදෙස් අනුව කුරුණෑගල දිසාව භාර නියෝජ්‍යගේ මෙහෙයවීමෙන් කුරුණෑගල මූලස්ථාන පොලිසියේ ළමා හා කාන්තා කාර්යාංශය සැකකරු පිළිබඳ වැඩිදුර විමර්ශන සිදු කරයි.
