අධ්‍යාපන පැකේජ මගින් දැනුම ලබාදෙන බව පවසමින් රුපියල් මිලියන 800ක මහා පරිමාණ පිරමීඩ ජාවාරමක නිරත වූ බව කියන කුරුණෑගල ව්‍යාපාරික පාසලක් හිමි ආචාර්යවරයකුගේ විදෙස් ගමන් වහාම තහනම් කරන ලෙස අධිකරණය ඊයේ (4) දින නියෝග කර තිබෙනවා.
අපරාධ පරීක්ෂණ දෙපාර්තමේන්තුවේ නිලධාරීන් කළ ඉල්ලීමකට අනුව කුරුණෑගල එරා මිරකල් පුද්ගලික සමාගමේ සහ ජෙනියිස් නමැති ව්‍යාපාරික පාසලේ අධ්‍යක්ෂ ලෙස කටයුතු කරන ආචාර්යවරයකු වන රණසිංහ ආරච්චිලාගේ ධම්මික කුමාර රණසිංහ නමැති අයගේයි මෙලෙස විදෙස් ගමන් තහනම් කර තිබෙන්නේ. ඒ කොළඹ ප්‍රධාන මහෙස්ත්‍රාත් ප්‍රසන්න අල්විස් විසින්.
ශ්‍රී ලංකා මහ බැංකුවේ නිරාකරණ හා බලගැන්වීමේ දෙපාර්තමේන්තුවේ අධ්‍යක්ෂවරයා විසින් කරන ලද පැමිණිල්ලකට අදාළව අපරාධ පරීක්ෂණ දෙපාර්තමේන්තුවේ නිලධාරීන් අධිකරණයට ඊයේ කරුණු වාර්තා කර තිබුණා.
අධිකරණයට දන්වා සිටින්නේ, මෙම නීතිවිරෝධී පිරමීඩ ජාවාරමට විදුහල්පතිවරුන්, ගුරුවරුන්, රජයේ නිලධාරීන්, බැංකු නිලධාරීන්, ව්‍යාපාරිකයන් ඇතුළු දහසකට අධික පිරිසක් හසු වී ඇතැයි අධිකරණයට දන්වා සිටි අපරාධ පරීක්ෂණ දෙපාර්තමේන්තුවේ නිලධාරීන් රට පුරා ප්‍රදේශ රැසක ජනතාව ඒ අතර සිටින බවයි.
මෙම සිද්ධියට අදාළව සිදුකරන විමර්ශනයේ ප්‍රගතිය අධිකරණයට වාර්තා කරන ලෙස ප්‍රධාන මහෙස්ත්‍රාත්වරයා අපරාධ පරීක්ෂණ දෙපාර්තමේන්තුවට නියම කර තිබෙනවා.
