දකුණු ඉන්දීය මහා නළු රජිනිකාන්ත් ප්‍රධාන චරිතය නිරූපණය කරනු ලබන නවතම චිත්‍රපටය වන ‘Jailer‘ හෙට (10) දිනයේ දී තිරගත වෙනවා.
මේ හේතුවෙන් ඉන්දියාවේ තමිල්නාඩු සහ කර්ණාටක ප්‍රාන්තවල සමාගම් සහ කාර්යාල රැසක්ම හෙට (10) දිනය නිවාඩු දිනයක් ලෙසින් ප්‍රකාශයට පත් කර තිබෙනවා.
ඒ අනුව චෙන්නායි හා බැංගලෝර් හි කාර්යාල රැසක්ම හෙට දින වැසෙන බවයි ඉන්දීය ආරංචි මාර්ග සඳහන් කරන්නේ.
එසේම හෙට දිනයේ දී Jailer චිත්‍රපටය නැරඹීම සඳහා සමාගම් කිහිපයක්ම සිය සේවකයින් හට නොමිලේ ටිකට්පත් ලබා දී ඇති බවයි පැවසෙන්නේ.
ඉන්දීය රු. කෝටි 200 ක වියදමකින් නිපදවා ඇති Jailer චිත්‍රපටය දකුණු ඉන්දීය සිනමා අධ්‍යක්ෂ නෙල්සන් දිලිප්කුමාර් ගේ අධ්‍යක්ෂනයක් වන අතර රජිනිකාන්ත් ට අමතරව මෝහන්ලාල්, ජැකී ෂරොෆ්, ශිවා රාජ්කුමාර්, රම්‍යා ක්‍රිෂ්ණන් යනා දී ජනප්‍රිය නළු නිළියන් රැසක් Jailer හි චරිත නිරූපණය කරනවා.
