Majestic Pride Casino ළඟදීම නෙළුම් කුළුණට

ශ්‍රී ලංකාව තුළ Majestic Pride Casino ස්ථාපිත කිරීම වෙනුවෙන් Golden Island Hospitality (පුද්) සමාගම සහ ඉන්දියාවේ ප්‍රමුඛතම සූදු ක්‍රීඩා සමාගම් සමූහයක් වන Majestic Group Hotels & Casinos සමඟ ගිවිසුමකට එළඹ ඇතැයි වාර්තා වෙනවා.

මේ අනුව ලොව ඉහළ මට්ටමේ සූදු ක්‍රීඩා අත්දැකීමක් ලබාදීම වෙනුවෙන් Majestic Pride Casino මධ්‍යස්ථානය කොළඹ අගනගරයේ නෙළුම් කුළුණ පරිශ්‍රයේ ස්ථාපිත කිරීමට නියමිතයි.

ශ්‍රී ලංකාවේ මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය විසින් 2010 අංක 17 දරන කැසිනෝ ව්‍යාපාර (නියාමන) පනත යටතේ M/S Golden Island Hospitality පුද්ගලික සමාගමට කැසිනෝ ව්‍යාපාර බලපත්‍රයක් ලබා දී තිබෙනවා.

මීට අදාළ සියලු ගිවිසුම් කටයුතු පසුගිය ජූලි 04 දින අවසන් කිරීමත් සමඟම මෙරට සූදු ක්‍රීඩා ඉතිහාසයේ නවතම පරිච්ඡේදයක් ආරම්භ කිරීමට Majestic Pride Casino සැදී පැහැදී සිටින බව සඳහන්.

මෙම ව්‍යාපාර සහයෝගීතාවය තවදුරටත් ශක්තිමත් කරමින් 1978 අංක 4 දරන ශ්‍රී ලංකා ආයෝජන මණ්ඩලයේ 17(2) වගන්තිය යටතේ 2024 අගෝස්තු 01 වැනි දින Golden Island Hospitality Private Limited හා ශ්‍රී ලංකා ආයෝජන මණ්ඩලය සමඟ ගිවිසුමක් ද අත්සන් කර තිබෙනවා.