ක්ලබ් වසන්ත ඝාතනයේ තවත් තොරතුරු එළියට

ප්‍රසිද්ධ ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත ඝාතනය කිරීමේ මෙහෙයුම ඩුබායීහී සැඟව සිටින ලොකු පැටී හා ගොනා කෝවිලේ ශාන්ත නැමැති අපරාධකරුවන් දෙදෙනා සෘජුවම එක්වී සැලසුම් කර ඇති බව පොලීසිය අනාවරණය කරගෙන තිබෙනවා.

කෙසේවෙතත් ඝාතනයට හේතුව මෙතෙක් අනාවරණ වී නොමැති බවයි පොලීසිය පවසන්නේ.

වෙඩික්කරුවන් අදාළ ඝාතනය සිදුකරන අයුරු CCTV කැමරාවල සටහන්ව තිබූ අතර ඒ අනුව, බස්නාහිර දකුණ භාර නියෝජ්‍ය පොලිස්පති ගයංග මාරපන මහතාගේ සෘජු අධීක්ෂණය යටතේ බස්නාහිර දකුණ අපරාධ කොට්ඨාසය ඇතුළු පොලිස් කණ්ඩායම් 6ක් විමර්ශන ආරම්භ කර තිබෙනවා.

එහි ප්‍රතිඵයක් ලෙස වෙඩික්කරුවන් පැමිණි මෝටර් රථය ඝාතනය සිදුවී සුළු වේලාවක් තුළ සොයාගත්තේ, කඩුවෙල, කොරතොට ප්‍රදේශයේ මාර්ගයක හැර දමාගොස් තිබියදීයි.

මෝටර් රථයේ පැමිණි පිරිස වෙනත් වෑන් රථයකින් කොරතොට සිට පළාගොස් තිබූ අතර එම වෑන් රථයද ඊයේ රාත්‍රියේදීම සොයාගැනුණේ බුලත්සිංහල, දෙල්මැල්ල ප්‍රදේශයේ පාළු ඉඩමක හැර දමාගොස් තිබියදීයි.

එහි අංක තහඩු ද අපරාධකරුවන් ගලාවාගෙන ගොස් ඇති අතර පොලිස් නිල සුනඛයෙකු යොදාගනිමින් එහි විමර්ශන දියත් කෙරුණා.

එහිදී අනාවරණය වී ඇත්තේ, වෑන් රථයේ සිටි පිරිස රත්නපුර අයගම ප්‍රදේශය දෙසට පළාගොස් ඇති බවයි.

එමෙන්ම වෑන් රථයේ තිබී අත්ල සටහන් 6ක් සහ ඇඟිලි සලකුණු 2ක් සොයාගත් බව සඳහන්.

වෑන් රථයේ ඉදිරි වම්පැත්තේ රෝදය අසල බඳෙහි තිබී බෙලිඅත්ත ප්‍රදේශයේ නම සඳහන් මුද්‍රා සටහනක් පොලීසිය සොයාගෙන ඇති අතර ඒ අනුව සැකකරන්නේ මෙම වෑන් රථය එම ප්‍රදේශයේ පුද්ගලයෙකුට අයත් වූවක් බවයි.

එය බෙලිඅත්ත දෙස සිට පැමිණ ඇතැයි සැකකරන බවත් පොලීසිය සඳහන් කළා.

මේ අතර සිද්ධිය සම්බන්ධයෙන් පොලීසිය අදාළ ටැටූ මධ්‍යස්ථානයේ හිමිකරු ඇතුළු පුද්ගලයන් පස්දෙනෙකුගෙන් ප්‍රකාශ සටහන් කරගෙන තිබෙන අතර විමර්ශනවලදී මේවන විට අනාවරණය වී ඇත්තේ, සුරේන්ද්‍ර වසන්ත පෙරේරා නොහොත් ක්ලබ් වසන්ත ඝාතනය කිරිමේ මෙහෙයුම ඩුබායීහී සැඟව සිටින ලොකු පැටී හා ගොනා කෝවිලේ ශාන්ත නැමැති අපරාධකරුවන් දෙදෙනා සෘජුවම එක්වී සැලසුම් කර ඇති බවයි.

කංජිපානි ඉම්රාන් නැමති අපරාධකරුගේ සෘජු සබඳතාවක් මෙතෙක් අනාවරණ වී නොමැති අතර ඔහු පිළිබඳව සැක පළකරන්නේ වෙඩිතැබීම සිදුවූ ස්ථානයේ තිබී සොයාගත් පතොරම් කොපුවල සටහන් කර තිබූ KPI යන කෙටි යෙදුම හේතුවෙන් බවයි පොලීසිය සඳහන් කරන්නේ.

මේ අතර කොළඹ ජාතික රෝහලේ ප්‍රතිකර ලබන ගායන ශිල්පිනී කේ. සුජීවාගේ සෞඛ්‍ය තත්ත්වය මේවන විට යහපත් අතට හැරෙමින් පවතින බව එහි නියෝජ්‍ය අධ්‍යක්ෂ වෛද්‍ය රුක්ෂ‍ාන් බෙල්ලන සඳහන් කරනවා.

ඇයට පැය 4ක පමණ ශල්‍යකර්මයක් සිදුකර ඇති අතර වෙඩි ප්‍රහාරයෙන් ඇයගේ වම් පාදයට දරුණු තුවාල සිදුව ඇතැයි සඳහන්.

වෙඩි ප්‍රහාරයෙන් බරපතළ තුවාල ලැබූ ක්ලබ් වසන්තගේ බිරිඳව හෝමාගම රෝහලේ සිට කළුබෝවිල රෝහලට මාරුකර යවා ඇති අතර ඇයගේ තත්ත්වය බරපතළ බැවින් මේවන විටත් ඇය එහි දැඩිසත්කාර ඒකකයේ ප්‍රතිකාර ලබන බව රෝහල් ආරංචිමාර්ග සඳහන් කරනවා.

රෝහල්ගතව ප්‍රතිකාර ලබන අනෙක් දෙදෙනාගේ තත්ත්වය බරපතළ නොවන බවයි වාර්තා වන්නේ

මේ අතර ක්ලබ් වසන්තගේ හා අනෙක් පුද්ගලයාගේ සිරුරු තවමත් හෝමාගම රෝහලේ තැන්පත් කර තිබෙන බව පොලීසිය ප්‍රකාශ කරනවා.

LEAVE A REPLY

Please enter your comment!
Please enter your name here

Latest

More articles