සීමාවාසික වෛද්ය පුහුණුව ආරම්භ කිරීමටත් පෙර පුහුණු වෛද්යවරියක ලෙස පෙනී සිට නීතිඥ යුවළකගේ අවුරුදු 6 සහ 8 වියේ පසුවූ කුඩා දරුවන් දෙදෙනෙකුට පෞද්ගලික වෛද්ය සායනයක් තුළ දී වෛද්ය ප්රතිකාර ලබාදීමේ චෝදනාවට අත්අඩංගුවට ගත් වෛද්ය ශිෂ්යාවක් ලබන 19 වනදා දක්වා රක්ෂිත බන්ධනාගාරගත කිරීමට කොළඹ අතිරේක මහෙස්ත්රාත් හර්ෂණ කැකුණවෙල ඊයේ (15) පස්වරුවේ නියෝග කර තිබෙනවා.
පසුගිය 3 වෙනිදා කොළොන්නාව ප්රදේශයේ පිහිටි වෛද්ය මධ්යස්ථානයකට පැමිණ තිබූ නීතිඥ හුසේන් අසාර් සයිතුන් සහ නීතිඥවරියක වන පාතිමා ජුතයින්ගේ දරුවන් දෙදෙනොට ඇය වෛද්ය ප්රතිකාර ලබාදී තිබූ අතර, එකී වෛද්ය ප්රතිකාර ලැබීමෙන් පසුව ඔවුන්ගේ රෝගී තත්ත්වය උත්සන්න වීම නිසා ඒ පිළිබඳ සැකකාර වෛද්යවරියට දන්වා වෛද්ය සහතිකයක් ලබාගැනීමට පියවර ගෙන තිබුණා.
එකී වෛද්ය සහතිකයේ සඳහන් නිල මුද්රාවේ වෙනත් වෛද්යවරයෙකුගේ නමක් සඳහන්වී තිබී ඇති අතර පසුව ඒ පිළිබඳව විමසීමේ දී ඕනෑම අයෙකුට වෛද්ය ප්රතිකාර ලබාදීමට තරම් තමා සුදුසුකම් ලබා ඇති බව සැකකාරිය පවසා ඇති බවයි සඳහන් වන්නේ.
ඒ අනුව අදාළ නීතිඥවරුන් වැල්ලම්පිටිය පොලීසියට පැමිණිල්ලක් ගොනුකර තිබෙනවා.
එකී පැමිණිල්ල අනුව අධිකරණයට ඉදිරිපත් කිරීම සඳහා තොරතුරු වාර්තාවක් සකස් කොට කොළඹ මහෙස්ත්රාත් අධිකරණයේ ලියාපදිංචි කර තිබූ නමුත්, එවැනි සැකකාරියක් හෝ පෙර කී තොරතුරු වාර්තාව, අධිකරණයට ඉදිරිපත් නොකිරීම පිළිබඳව එම නීතිඥ යුවළ හා සෙසු නීතිඥවරුන් පිරිසක් අතිරේක මහෙස්ත්රාත්වරයාට කරුණු දක්වා ඇතැයි සඳහන්.
ඒ අනුව අදාළ පොලිස් නිලධාරීන් කැඳවූ අතිරේක මහෙස්ත්රාත් හර්ෂණ කැකුණවෙල , සැකකාර වෛද්ය සිසුවිය සිදුකර ඇත්තේ, මිනීමැරීමට තැත් කිරීමට සමාන වරදක් වන බැවින් වහාම ඇය අත්අඩංගුවට ගෙන අධිකරණයට ඉදිරිපත් කරන ලෙස පොලීසියට නියෝග කර තිබෙනවා.
නිසි බලයක් නොමැතිව වෛද්ය වෘත්තියේ නියැලීම යන චෝදනාවට අත්අඩංගුවට ගත් අජ්රා නියාස් නැමති සැකකාරිය එලෙස රක්ෂිත බන්ධනාගාරගත කිරීමට නියෝග කර ඇති අතර, නීතිඥ චින්තක ප්රනාන්දු, මර්වින් ද සිල්වා ඇතුළු 30කට ආසන්න නීතිඥ මණ්ඩලයක් සමඟ ජ්යෙෂ්ඨ නීතිඥ වීරසේන රණහේවා ද අගතියට පත් පාර්ශවය වෙනුවෙන් පෙනී සිටි බවයි වාර්තා වන්නේ.
