ඉරානය සමඟ වෙළෙඳ ගනුදෙනු සිදුකරන රටවල්වලට එරෙහිව සම්බාධක පැනවීමේ අවදානමක් ඇතැයි අමෙරිකාව අද අනතුරු ඇඟවීමක් නිකුත් කර තිබෙන බව වාර්තා වෙනවා.
අමෙරිකාව මෙම අනතුරු ඇඟවීම සිදුකළේ ඉරාන ජනාධිපති ඊබ්රහිම් රයිසි පාකිස්තානයේ දින 3ක සංචාරය අද (24) නිමකර ශ්රී ලංකාව බලා පිටත් වීමෙන් පසුව වීම විශේෂත්වයක්.
ඉරාන ජනාධිපතිවරයාගේ සංචාරය අතරතුරදී පාකිස්තානය සහ ඉරානය අතර අවබෝධතා ගිවිසුම් 8ක් අත්සන් කෙරුණු අතර දෙරට අතර වෙළෙඳාම ඩොලර් බිලියන 10ක් දක්වා වැඩිකිරීමට ද ඉන් යෝජනා කර තිබූ බවයි පැවසෙන්නේ.
ඉරාන ජනපතිවරයා සඳුදා (22) පාකිස්තානයට පැමිණි අතර, ඔහුගේ සංචාරයේ එක ප්රධාන අරමුණක් ලෙස සඳහන් වූයේ දෙරට අතර පැවති ගැටලු නිරාකරණය කර ගැනීම බව වැඩි දුරටත් සඳහන් වෙනවා.
