පවතින කාලගුණික තත්ත්වය හා උතුරු පෙදෙසින් පැමිණෙන දේශසීමා ව්‍යාකූල තත්ත්වය හේතුවෙන් අද (30) දිනය තුළ වායු ගුණ තත්ත්ව දර්ශකය (SLAQl) 92 – 120ත් අතර අගයක දිනය පුරාම පැවතිය හැකි බව ජාතික ගොඩනැගිලි පර්යේෂණ සංවිධානය පවසනවා.
එම සංවිධානයේ පාරිසරික අධ්‍යන හා සේවා අංශය නිකුත්කළ දෛනික වායු ගුණ තත්ත්ව වාර්තාව අනුව දිවයිනේ බොහෝ ප්‍රදේශවල වායුව සුළු වශයෙන් අහිතකර මට්ටමක් දක්වා ඉහළ යා හැකි බවයි ඔවුන් පෙන්වා දෙන්නේ.
අද දිනයේ වායුගුණ තත්ත්ව දර්ශකයට අනුව කොළඹ නගරය 108 – 116ත් අතර අගයක් යනු ඇතැයි අපේක්ෂා කෙරෙනවා.
එමෙන්ම යාපනයේ මෙන්ම පොළොන්නරුවේ එම තත්ත්වය 112- 120ත් අතර අගයක් දක්වා ඉහළ යා හැකි බවයි සඳහන් වන්නේ.
ඊට අමතරව කුරණෑගල, වව්නියාව, මහනුවර, කෑගල්ල, ගාල්ල, බදුල්ල, ත්‍රිකුණාමලය ඇතුළු නගර රැසකම වායු ගුණ තත්ත්ව දර්ශකය 100ට වැඩි අගයක් ගනු ඇතැයි අපේක්ෂා කෙරෙනවා.
වායු ගුණ තත්ත්ව දර්ශකය අනුව 0-50 අතර යනු යහපත් මට්ටම වන අතර, එය 51 -100 අතර මධ්‍යස්ථ මට්ටමක්.
කෙසේ නමුත් 101-150 අතර සුළු වශයෙන් අහිතකර වන අතර, 151 – 200 දක්වා අහිතකර මට්ටමක් වන අතර 201- 300ත් අතර ඉතා අහිතකර වන අතර, 301 -500 අනතුරුදායක බවද සඳහන්.
මෙම තත්ත්වය හේතුවෙන් සංවේදී පුද්ගලයින්ට හුස්ම ගැනීමේ අපහසුතා ඇති වුවහොත් වෛද්‍ය උපදෙස් සඳහා යොමුවන ලෙස එම සංවිධානය ජනතාවගෙන් ඉල්ලා තිබෙනවා.
කෙසේ නමුත් නුවරඑළිය, ඇඹිලිපිටිය, කළුතර හම්බන්තොට හා මොණරාගල යන නගර වල පමණක් වායුගුණ තත්ත්ව දර්ශකය මධ්‍යස්ථ මට්ටමක පැවතිය හැකි බව ජාතික ගොඩනැගිලි පර්යේෂණ සංවිධානය බලාපොරොත්තු වනවා.
කෙසේ වෙතත් මෙරට වායු ගුණ තත්ත්ව වාර්තාව අනුව ඊයේ (29) බොහෝ නාගරික ප්‍රදේශවල වායුව සුළු වශයෙන් අහිතකර මට්ටමක පැවතුණු බවයි සඳහන් වන්නේ.
