වසර තුනකට පෙර මාරාන්තික තුවාල ලැබූ පෙත්සම්කරුවෙකු ඇතුළු පළමු වසරේ සිසුන්ට නවක වදය දුන් ජ්‍යෙෂ්ඨ සිසුන්ට එරෙහිව ගෙන ඇති ක්‍රියාමාර්ග පිළිබඳ වාර්තාවක් ඉදිරිපත් කරන ලෙස ශ්‍රේෂ්ඨාධිකරණය ශ්‍රී ජයවර්ධනපුර විශ්වවිද්‍යාලයේ උපකුලපතිවරයාට නියෝග කර තිබෙනවා.
බුවනෙක අලුවිහාරේ, ශිරාන් ගුණරත්න සහ ප්‍රියන්ත ප්‍රනාන්දු යන විනිසුරු මඩුල්ල විසින් සිසුන්ට නවක වදය ලබාදීමේ ස්වභාවය සහ නවක වදය සිදු කළ පුද්ගලයන්ට එරෙහිව ගෙන ඇති ක්‍රියාමාර්ග පිළිබඳ වාර්තාවක් ලබාදෙන ලෙස ද විශ්වවිද්‍යාල ප්‍රතිපාදන කොමිෂන් සභාවට නියෝග කළා.
2020 වසරේ දී පළමු වසරේ සිසුන් සඳහා පැවති සාදයක දී විශාල බැකෝ ටයරයක් පඩිපෙළකින් පහළට පෙරළීමෙන් බරපතළ ශාරීරික තුවාල සහ මොළයට තුවාල සිදු වූ පසිඳු හිරුෂාන් සිල්වා නමැති සිසුවා ගොනු කළ මූලික අයිතිවාසිකම් පෙත්සමක් විභාගයට ගත් අවස්ථාවේදී මෙම නියෝගය නිකුත් කරනු ලැබුවා.
