රෝහල් සේවකයන්නේ වර්ජනය හේතුවෙන් රෝගීන්ට සිදුවන අපහසුතා මඟහරවා ගැනීමට දිවයින පුරා රෝහල් සඳහා ත්‍රිවිධ හමුදාව කැඳවා තිබෙනවා.
ඒ අද (16) උදෑසන 06.30 සිට සෞඛ්‍ය සේවාවේ වෛද්‍යවරු හැර වෘත්තීය සමිති 72ක් පැය 24ක කාලයක් සඳහා සංකේත වැඩවර්ජනයක් ආරම්භ කිරීම නිසායි.
සෞඛ්‍ය අමාත්‍යංශය සිදුකළ ඉල්ලීමක් මතයි මෙලෙස ත්‍රිවිධ හමුදාව රෝහල් සඳහා කැඳවා තිබෙන්නේ.
වෛද්‍යවරුන්ට ලබාදුන් රුපියල් 35,000ක දීමනාව තමන්ට ද ලබාදෙන ලෙස ඉල්ලමින් මෙම වෘත්තීය සමිති ක්‍රියාමාර්ගය දියත් කරන අතර අත්‍යාවශ්‍ය කටයුතු පමණක් සිදුකිරීමටයි සෞඛ්‍ය වෘත්තීය සමිති තීරණය කර ඇත්තේ.
කෙසේ වෙතත් අද පෙරවරුවේ සෞඛ්‍ය අමාත්‍ය රමේෂ් පතිරණ විසින් වර්ජනයේ නිරත වෘත්තීය සමිති සඳහා සාකච්ඡාවකට ද ආරාධනා කර ඇති බවයි වාර්තා වෙන්නේ.
