විකිලීක්ස්’ වෙබ් අඩවිය ඔස්සේ ඇමෙරිකාවේ හමුදා රහස් ලොවට හෙලි කළ බව ඇමෙරිකන් අධිකරණය හමුවේ පිළිගැනීමට තමන් සූදානම් බව විකිලීක්ස් වෙබ් අඩවියේ නිර්මාතෘ 52 හැවිරිදි ජුලියන් අසාන්ජ් පවසා ඇතැයි විදෙස් මාධ්ය වාර්තා කරනවා.
විකිලීක්ස් නිර්මාතෘවරයා මෙසේ පවසා ඇත්තේ ඇමෙරිකන් බලධාරීන් සමඟ එකඟතාවක් ඇති කර ගැනීමෙන් පසුවයි.
ඒ අනුව, 2019 වසරේ ලන්ඩන් නුවර අධිආරක්ෂිත බෙල්මාර්ෂ් බන්ධනාගාරයේ රඳවා සිටි අසාන්ජ්ට නිදහස හිමිවුණු අතර ඔහු ඇමෙරිකන් නිලධාරීන්ගේ භාරයට පත් වුණා.
ඇමෙරිකාවේ ජාතික ආරක්ෂක තොරතුරු ලබා ගනිමින්, ඒවා ප්රසිද්ධියට පත් කරමින් කුමන්ත්රණයක් කළේ යැයි අසාන්ජ්ට ඇමෙරිකාවෙන් චෝදනා එල්ල වී ඇති අතර එම චෝදනා සම්බන්ධයෙන් නඩු විභාගය පැවැත්වෙනු ඇත්තේ ඇමෙරිකාවට අයත් පාලන ප්රදේශයක් වන පැසිෆික් සාගරයේ උතුරු මරියානා දූපත් අධිකරණයකය.
ඇමෙරිකානු බලධාරීන් සහ අසාන්ජ් අතරේ ඇති කරගත් එකඟතාවට අනුව, අසාන්ජ් ඇමෙරිකන් අධිකරණය හමුවේ වරදකරු යැයි පිළිගත් විට ඔහුට මාස 62 ක සිරදඬුවමක් නියම කරනු ඇති බවයි පැවසෙන්නේ.
ඔස්ට්රේලියානුවකු වන අසාන්ජ් විකිලීක්ස් වෙබ් අඩවිය ඔස්සේ ඇමෙරිකා හමුදාවේ රහස් ලොවට හෙලි කළේ 2010 වසරේදීයි.
ඇමෙරිකන් අත්අඩංගුවෙන් බේරී, අසාන්ජ් බ්රිතාන්යයේ ලන්ඩන් නුවර එක්වදෝර් තානාපති කාර්යාලයේ ආරක්ෂාව පැතූ අතර ඔහු වසර හතක් එහි රැඳී සිටියා. මෙම කාලයේ ඇමෙරිකාව උත්සාහ කළේ ස්වීඩනය හරහා අසාන්ජ් අත්අඩංගුවට ගැනීමට වුවත් ඇමරිකාවේ එම උත්සහය එය සාර්ථක වුයේ නැහැ.
අවසානයේ ලන්ඩනයේ එක්වදෝර් තානාපතිවරයා සමඟත් තානාපති කාර්යාලයේ නිලධාරීන් සමඟත් ගැටුම් ඇතිකරගත් බැවින්, එක්වදෝරය අසාන්ජ් ලන්ඩන් පොලිසියට භාර දීමට කටුයුතු කළා.
අසාන්ජ් අධිආරක්ෂිත බෙල්මාර්ෂ් බන්ධනාගාරයට යැවුණේ ඒ අනුවයි.
