වෙඩි තබා තරුණයා ඝාතනය: පොලිස් නිලධාරියා වෙනුවෙන් නීතිඥයෝ ඉදිරිපත් නොවෙති

නාරම්මල ප්‍රදේශයේදී ලොරි රථයක රියදුරෙකුට සිවිල් ඇඳුමින් පැමිණ වෙඩි තබා ඝාතනය කළ සිදුවීමට අදාළව රුපියල් කෝටි 20ක් වන්දි ඉල්ලා මිය ගිය අයගේ බිරිඳ විසින් ශ්‍රේෂ්ඨාධිකරණයට පෙත්සමක් ඉදිරිපත් කර තිබෙනවා.

එම පෙත්සම අප්‍රේල් මස 04 වෙනිදා සලකා බැලීමට ශ්‍රේෂ්ඨාධිකරණය දින නියම කරනු ලැබුවා.

මෙම පෙත්සමේ වගඋත්තරකාර නිලධාරියා ඇතුළු පොලිස් නිලධාරීන් වෙනුවෙන් කිසිදු නීතිඥයෙක් ඉදිරිපත්ව සිටියේ නැහැ.

රජයේ ජෙ.නීතිඥයාද පෙනී සිටියේ නීතිපතිවරයා වෙනුවෙන් පමණයි.

මෙම පෙත්සමේ වගඋත්තරකරුවන් ලෙස නාරම්මල පොලිසියේ උප පොලිස් පරීක්ෂක කහවිටගේ ගුණවර්ධන, කොස්තාපල් චමුදිත බණ්ඩාර, නාරම්මල පොලිස් ස්ථානාධිපතිවරයා, පොලිස්පතිවරයා සහ නීතිපතිවරයා නම් කර තිබෙනවා.

සමාජ ජාලාවල හුවමාරු වූ වීඩියෝපට මගින් අදාළ වෙඩි තැබීම තමා සිදු කළ බව පොලිස් පරීක්ෂකවරයා පිළිගත් බවත්, වැටී තිබූ පතරොම් සාක්කුවට දමා ගත් බවත් කියන පෙත්සම්කාරිය, සිය සැමියාගේ හිසට එල්ලකර වෙඩි තැබීම සිදු කර ඇති බව පවසනවා. නිලධාරීන් බලය ඉක්මවා යමින් අවභාවිත කර ඇති බවත් එමගින් සිය මූලික අයිතිවාසිකම් කඩවී ඇති බවත් කියන ඈ කෝටි 20ක වන්දියක් ඉල්ලා සිටිනවා.

එසේම මාර්ගයේ ගමන් ගන්නා වාහන පරීක්ෂා කිරීමේදී පොලිසිය විසින් අනුගමනය කළ යුතු මාර්ගෝපදේශ මාලාවක් සකස් කිරීමට නියෝග නිකුත් කරන්නැයිද එම පෙත්සම මගින් අධිකරණයෙන් ඉල්ලා සිටිනවා.